Բռնաբարության մեջ մեղադրվող նախկին ոստիկանի գործով վերաքննիչը անսպասելի որոշում կայացրեց

Քիչ առաջ Վերաքննիչ քրեական դատարանն անսպասելի որոշում կայացրեց  անձի առևանգման, բռնաբարության ու ավազակային հարձակում կատարելու մեջ մեղադրվող նախկին ոստիկան Էդգար Վարագյանի գործով: Դատարանը մասնակի բավարարեց Վարագյանի պաշտպան Կրոմվել Գրիգորյանի բողոքը և գործը սահմանված ծավալով ուղարկեց առաջին ատյանի դատարան`  նոր քննության:

Հիշեցնենք, որ Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանի վճռով` անձի առևանգման, բռնաբարության, ավազսկային հարձակում կատարելու մեջ մեղադրվող նախկին ոստիկանը դատապարտվել էր 15 տարվա ազատազրկման:

Վարագյանի պաշտպան Կրոմվել Գրիգորյանը միջնորդել է բեկանել առաջին ատյանի դատարանի վճիռն ու իր պաշտպանյալի նկատմամբ կայացնել արդարացման դատական ակտ կամ գործն ուղարկել առաջին ատյան` նոր քննության:

Պաշտպանը միջնորդել էր կրկին հարցաքննել գործով տուժող Քարոլին Բաղումյանին և մի շարք վկաների, ինչպես նաև պահանջել տուժողի հեռախոսազանգերի վերծանումները: Սակայն դատավորը մերժեց միջնորդությունը` պատճառաբանելով, որ գործով ձեռք բերված ապացույցները բավարար են`  համապատասխան ակտ կայացնելու համար:

Ի դեպ` Կրոմվել Գրիգորյանը Վարագյանի` թվով երրորդ պաշտպանն է:

Ամբաստանյալ Էդգար Վարագյանը դատարանի որոշմանն ուրախ արձագանքեց. «Աստված ձեր ընտանիքին պահապան»: Մինչդեռ առաջին ատյանի դատարանում վճիռը հրապարակելուց հետո հետևյալ կերպ էր արտահայտվել. «Աստված թող ձեր երեխեքի դեմը բերի»: