Ո՞ր որդին է իր հորը լսում, որ նա լսի. Ռիչարդ Հովհաննիսյանը՝ Րաֆֆի Հովհաննիսյանի մասին

Ամերիկաբնակ հայ պատմաբան, ՀՀ ԳԱԱ արտասահմանյան անդամ Ռիչարդ Հովհաննիսյանը համարում է, որ Հայոց ցեղասպանության հարյուրամյա տարելիցի միջոցառումներն այսքանով չպիտի վերջանան:

«Նրան, ինչ այսօր ունենք, այդքան էլ հեշտ չենք հասել, մեր ակտիվիստները թեև քիչ էին, սակայն արդյունքի հասանք: Սակայն սա վերջնական արդյունքը չէ»,- այսօր լրագրողների հետ զրույցում ասաց  նա:

Ռիչարդ Հովհաննիսյանն առանձնացրեց երկու ուղղություն, որոնցով հետագայում կարելի է աշխատել՝ միջազգային հանրությունը և Թուրքիայի այն քաղաքացիները, ովքեր համարձակվում են հարցականով մոտենալ թուրքական իշխանությունների հայտարարություններին:

Ինչ վերաբերում է հայոց պահանջատիրությանը, ապա Հովաննիսյանը շեշտեց, որ դա պետության որոշելիքն է, քանի որ մենք ունենք առավելագույն և նվազագույն պահանջներով փաստաթղթեր:

Yerkir.am-ի հարցին, թե արդյո՞ք հետևում է իր որդու ՝ Րաֆֆի Հովհաննիսյանի քաղաքական գործունեությանը, Ռիչարդ Հովհաննիսյանը պատասխանեց. «Միայն հեռվից»:

«Իսկ խորհուրդներ տալի՞ս եք, երբ նա իր քաղաքական գործունեության ընթացքում նեղության մեջ է լինում» հարցին պատասխանեց. «Խորհուրդ չեմ տալիս, քանզի այդ ո՞ր որդին է իր հորը լսում, որ նա լսի»: