Ադրբեջանի օրհներգի փոխարեն հնչել է Հայաստանի օրհներգը (տեսանյութ)

Ապրիլի 17-ին Սերբիայի Նովի սադ քաղաքում մեկնարկած Եվրոպայի սամբոյի պատանեկան ու երիտասարդական առաջնության մրցումային առաջին օրը մեր մարզիկներից չորսն արժանացան մեդալի:

Պատանիներից Դանիել Գաբրիելյանը /60կգ/ և երիտասարդներից Արման Նիազյանը /48կգ/ արժանացան բրոնզե մեդալների, իսկ Վոլոդյա Սարգսյանը /62 կգ/ և Միշա Նազարյանը /82կգ/ հասան եզրափակիչ, սակայն գրավեցին երկրորդ տեղն ու արժանացան արծաթե պարգևների:

Պարգևատրման արարողության ընթացքում մի զավեշտալի դեպք արձանագրվեց: Երիտասարդների 62 կգ քաշային կարգում, ի պատիվ հաղթող Քամրան Ասքարովի, Ադրբեջանի հիմնի փոխարեն հնչեց Հայաստանի պետական օրհներգը: Թյուրիմացությունը շտկվեց րոպեներ անց: Այս մասին հայտնում է Հայաստանի սամբոյի ֆեդերացիայի պաշտոնական կայքը:

 Հավելենք, որ մեր մյուս մարզիկները մրցագորգ դուրս կգան ապրիլի 18-ին և 19-ին: