Ծանրամարտի Հայաստանի առաջնություն. վերջին օրվա արդյունքները

Երևանի օլիմպիական հերթափոխի հանրապետական քոլեջում ավարտվեց ծանրամարտի տղամարդկանց Հայաստանի առաջնությունը: Մրցումային վերջին օրը մրցահարթակ դուրս եկան 105 և + 105 կգ քաշային կարգի ծանրորդները: 105 կգ քաշային կարգի հինգ մարզիկների մեջ լավագույն արդյունքն արձանագրեց գյումրեցի Արտյոմ Պետրոսյանը՝ 321 կիլոգրամով դառնալով Հայաստանի չեմպիոն: Նրանից մեկ կիլոգրամ ետ մնաց նրա համաքաղաքացի Միքայել Միքայելյանը: Բրոնզե մեդալը երկամարտի 298 կգ-ով նվաճեց օլիմպիական հերթափոխի քոլեջի սան Սարգիս Կիրակոսյանը:

+ 105 կգ քաշայինների պայքարում անվիճելի էր պատանեկան օլիմպիական խաղերի չեմպիոն Սիմոն Մարտիրոսյանի առավելությունը: Նա պոկեց 180 և հրեց 210 կիլոգրամ: Հայաստանի նորընծա չեմպիոնին 15 կիլոգրամ զիջեց էջմիածինցի կարապետ Բարսեղյանը: Իսկ մրցանակային եռյակը երկամարտի 312 կիլոգրամով եզրափակեց օլիմպիական հերթափոխի քոլեջի սան Անդրանիկ Հովհաննիսյանը: