Վրաստանի վարչապետը ժամանակին սպասք լվացող է աշխատել

Վրաստանի վարչապետ Իրակլի Ղարիբաշվիլին պատմել է վարչապետ դառնալու` իր ճանապարհի մասին` նշելով, որ անգամ պատկերացնել չէր կարող, որ մի օր վարչապետ է դառնալու. հայտնում է Грузия online-ը:

«Սորբոնի համալսարանում սովորելու տարիներին ես ռեստորանում մատուցող եմ եղել և սպասք եմ լվացել, բայց միշտ ցանկացել եմ ծառայել իմ երկրին, սակայն անգամ չէի կարող պատկերացնել, որ վարչապետ կդառնամ»,- պատմել է Ղարիբաշվիլին Leaders պարբերականին տված հարցազրույցում:

Նա պատմել է, որ աշխատել է մասնավոր ընկերությունում, ձեռք է բերել հետաքրքիր փորձ, ծանոթացել է տաղանդավոր մարդկանց, այդ թվում՝ իրեն նախորդած վարչապետ Բիձինա Իվանիշվիլիի հետ:

Ղարիբաշվիլիի խոսքով՝ քաղաքականության մեջ ինքը պատիվ է ունեցել աշխատելու ներքին գործերի նախարարի պաշտոնում: Ըստ նրա`պաշտոնում գտնվելու ընթացքում շատ կարևոր է հավատարիմ և անկեղծ լինել: