Պուտինի ստեղծած միությունը ճաք է տալիս՝ Բելառուսը վերադարձնում է մաքսակետերը

Բելառուսը Ռուսաստանի քայլերից և նախագահ Ալեքսանդր Լուկաշենկոյի կտրուկ հայտարարություններից հետո վերադարձրել է ռուս-բելառուսական սահմանի մաքսակետերը, որոնք հանվել էին Մաքսային միության ստեղծման ժամանակ. հայտնում է РБК-ն: Մաքսային ստուգման են ենթարկվում ոչ միայն բեռնատար, այլև մարդատար մեքենաները:

Նշենք, որ նոյեմբերի 26-ից արգելվել է Ռուսաստան բելառուսական մսի ներկրման գրեթե ամբողջ ծավալը՝ մոտ 400 հազ․ տոննա: «Ռոսսելխոզնադզորը» հայտարարել է, որ բելառուսական պարենամթերքը չի համապատասխանում Ռուսաստանի և Մաքսային միության օրենսդրության նորմերին ու պահանջներին: Ռուսաստանը նաև հայտարարել է ռուս-բելառուսական սահմանը հատող ապրանքների վերահսկողության խստացման մասին: Ռուսաստանի իշխանությունների համաձայն՝ միջոցառումները պայմանավորված են այն հանգամանքով, որ Բելառուսի հետ սահմանով Ռուսաստան են ներկրվում ապրանքներ, որոնց ներմուծումը ներկայումս արգելված է:

«Ռուսաստանն իրեն անպարկեշտ է պահել՝ շատ ձեռնարկությունների արգելելով ՌԴ տարածք սննդամթերքի մատակարարումը: Ռուսաստանը խախտել է մեր բոլոր պայմանավորվածությունները, որոնց հասել էինք Մաքսային միությունում»,- հայտարարել է Լուկաշենկոն՝ մեկանաբանելով ՌԴ-ի քայլը: