Դանակահարվածն ընդունվել է սրտի կանգով. բժիշկները պայքարում են վանաձորցի դպրոցականի կյանքի համար

Երեկ Վանաձորի Գևորգ Չաուշի անվան թիվ 24 միջնակարգ դպրոցի բակում դանակահարություն է տեղի ունեցել. Վանաձորի թիվ 1 հիվանդանոց է տեղափոխվել դպրոցի 12-րդ դասարանի աշակերտ` 17-ամյա Տիգրան Գևորգյանը:

Փաստի առթիվ ՀՀ Քննչական կոմիտեի Լոռու մարզային բաժնում հարուցվել է քրեական գործ ՝ ՀՀ քրեական օրենսգրքի 112-րդ հոդվածի հատկանիշներով:

«Հիվանդն ընդունվել է 0 ճնշումով, առանց պուլսի, պրակտիկորեն սրտի կանգով: Վիրահատել և ուղարկել են Երեւանի «Էրեբունի» ԲԿ»,- yerkir.am-ի հետ զրույցում հայտնեցին Վանաձորի թիվ 1 հիվանդանոցից:

«Էրեբունի» բժշկական կենտրոնի մամուլի քարտուղար Շուշան Հունանյանն էլ հայտնեց, որ այս պահին տղան հիվանդանոցի վերակենդանացման բաժանմունքում է, վիճակը ծանր է, բժիշկները պայքարում են նրա կյանքի համար: