Հրմշտոց` Կապանի հանրահավաքից հետո

Կապանում երեք քաղաքական ուժերի` ԲՀԿ-ի, ՀԱԿ-ի ու «Ժառանգության» կազմակերպած հանրահավաքից հետո Սյունիքի քաղաքապետարանի մոտ կանգնած մի խումբ տղամարդիկ բարձրախոսներով վանկարկում էին` «Հե-ռա-ցեք», և կարդում Սերժ Սարգսյանին ուղղված գովեստի տեքստեր: Սկսվեց հրմշտոց այդ մարդկանց և հանրահավաքի մասնակիցների, մասնավորապես` ՀԱԿ կուսակցությունից Վլադիմիր Կարապետյանի,  երիտասարդ ՀԱԿ-ականների և քաղաքապետարանի մոտ խմբված մի խումբ տղամարդկանց միջև:

Հրմշտոցը կարող էր վերածվել ծեծկռտուքի, եթե չմիջամտեին ոստիկանները ու չբաժանեին միմյանց հետ վիճող տղամարդկանց: Նշենք, որ քաղաքապետարանի մոտ հավաքված ու բարձրախոսներով «Հեռացեք» վանկարկող մարդկանց մի մասը հենց քաղաքապետարանի աշխատակիցներ էին, մի մասը` Հանրապետական կուսակցության անդամներ, ովքեր ասում էին, որ գոհ են կյանքից, որ ամեն ինչ լավ է, և որ Երևանից եկածները պետք է հեռանան: