Մինի հանրահավաքից հետո՝ ֆուտբոլի դիտում

Այսօր Ազատության հրապարակում անցկացված շուրջօրյա հանրահավաքում ՀԱԿ համակարգող Լեւոն Զուրաբյանը ցուցարարներին տեղեկացրել է, որ, որ վաղն իրենք կանցկացնեն մինի հանրահավաք, իսկ երեկոյան ժամը 20:00-ին Ազատության հրապարակում մեծ էկրան կտեղադրվի, որով հանրահավաքի մասնակիցները կարողանան դիտել Հայաստան-Մակեդոնիա ֆուտբոլային խաղը:

«Սա, հանուն համազգային միասնության, փոքր ժեստ է լինելու»,- հայտարարել է Լ. Զուրաբյանը եւ շարունակել. «Քանի որ շաբաթ օրը հանրահավաքի 10-րդ վճռական օրն է` շարունակել, թե` ոչ, ապա շաբաթ օրվա հանրահավաքից ոչ ոք բացակայելու իրավունք չունի»:

Զուրաբյանը նաեւ անդրադարձել է օրեր առաջ Ազատության հրապարակ այցելած քաղաքական գործիչներին` նշելով. «Ժողովուրդն ամեն ինչ արձանագրում է իր հիշողության մեջ: Ժողովրդին հնարավոր չէ խաբել PR դիվիդենդներով ու Ազատության հրապարակ գալով: Կա'մ միանում եք մեզ` այստեղ գալով, կա'մ էլ մեզ վարկաբեկելով եք զբաղված` ռեժիմի գործակալներից մեկը դառնալով»: