Վրաստանը, Թուրքիան ու Ադրբեջանը մտադիր են ամրապնդել պաշտպանունակությունը

Վրաստանը, Թուրքիան և Ադրբեջանը մտադիր են պաշտպանունակությունն ամրապնդելու մասին պլան մշակել: Այդ մասին «Իմեդի» հեռուստաընկերությանը տված հարցազրույցում  այտարարել է Վրաստանի պաշտպանության նախարար Իրակլի Ալասանիան . հայտնում է Грузия Online-ը:

«Անհրաժեշտ է ուշադրություն դարձնել այն հանգամանքին, որ այդ երեք պետությունները, որոնք իրականացնում են ռազմավարական նշանակության համատեղ նախագծեր, միակարծիք են, որ ճգնաժամային իրավիճակի դեպքում այդ ենթակառուցվածքը հարկավոր է պաշտպանել: Դա նաև Եվրոպայի և ՆԱՏՕ-ի շահերից է բխում, քանի որ հենց այդ տարանցիկ ճանապարհն է օգտագործվում Աֆղանստան դաշինքի բեռները տեղափոխելու համար: Տարանցումը մեծ նշանակություն ունի նաև անվտանգության ապահովման տեսանկյունից, առավել ևս Ռուսաստանի հետ լարված հարաբերությունների ֆոնին»,- ասել է Ալասանիան՝ հավելելով, որ այդ գործողություններն ուղղված չեն որևէ մեկի դեմ:

Օրերս երեք երկրների ՊՆ ղեկավարները հանդիպել են Նախիջևանում: Հանդիպման ընթացքում կարծիքներ էին փոխանակվել տարածաշրջանի ռազմաքաղաքական և անվտանգության իրավիճակի շուրջ: