Իտալական Ceramisia ընկերությունը հախճապակու գործարան կկառուցի Հայաստանում

Վարչապետ Հովիկ Աբրահամյանն ընդունել է հախճապակու արտադրությամբ զբաղվող իտալական Ceramisia ընկերության փոխնախագահ Ֆեդերիկո Պոլիդորիին: Պոլիդորին նշել է, որ իրենք աշխատանքներ են կատարվում առաջիկայում Հայաստանում հախճապակու արտադրությամբ զբաղվող գործարան կառուցելու ուղղությամբ: Գործարանի արտադրանքը նաև կարտահանվի:

Հովիկ Աբրահամյանը ողջունել է նախաձեռնությունը և հայտնել կառավարության աջակցությունը՝ ներդրումային ծրագրի իրականացման աշխատանքներում: Վարչապետը հույս է հայտնել, որ ծրագիրը կնպաստի Հայաստանում հախճապակու արտադրության ավանդույթների վերականգնմանը:

Այնուհետև Հովիկ Աբրահամյանը և Ֆեդերիկո Պոլիդորին քննարկել են ներդրումային ծրագրին առնչվող մի շարք հարցեր:

Ceramisia-ն իր արտադրանքն արտահանում է 25 երկիր: Այն Իտալիայում համարվում է տնային և հյուրանոցային հախճապակյա սպասքի արտադրությամբ զբաղվող ամենախոշոր ազգային կերամիկական ընկերությունը: Այս մասին հայտնում է ՀՀ կառավարության կայքը: