Պետք չէ արհեստականորեն սուր բաներ մտցնել. փաստաբանը` նիստի ընթացքում ծիծաղող մեղադրյալների մասին

2 տարեկան Լիա Միսակյանի մահվան գործով մեղադրյալների աթոռին են «Արաբկիր» ԲՀ-ի բժշկուհիներ Լիլիթ Վարդանյանն ու Զարուհի Այվազյանը: Համաձայն հրապարակումների` վերջին դատական նիստի ժամանակ, երբ հարցաքննվելիս է եղել փորձագետ, մեղադրյալներն ու դահլիճում նստած նրանց գործընկերները ծիծաղել են, իսկ դատավորը սպառնացել է սանկցիա կիրառել նրանց հանդեպ:

Թե արդյո՞ք կոռկետ է, որ մեղադրյալներն իրենց այդպես են պահում, երբ, վերջիվերջո, երեխա է մահացել և այդ մահվան մեջ էլ հենց իրենք են մեղադրվում, Yerkir.am-ի հետ զրույցում  Զ. Այվազյանի փաստաբան Երեմ Սարգսյանը պատասխանեց. «Միանշանակորեն չպետք է եզրակացություններ անել: Ո՞նց կարելի է նայել մարդու դեմքին ու, եթե դեմքի արտահայտությունը փոխվել է,  ասել, թե ծիծաղում է դեպքի վրա: Ո՞նց կարող է դեպքի վրա ծիծաղել: Դուք լրագրող եք, գործընկերներից մեկը մի բան է ասում, ժպտում եք, դա նշանակում է, որ  դեպքի վրա՞ եք ծիծաղում: Իհարկե` ոչ, լրիվ  ուրիշ բանի մասին է խոսքը, և պետք չէ արհեստականորեն սուր բաներ մտցնել»: