Անցկացվել է տոնական զորահանդես

Այսօր պաշտպանության նախարարության չորրորդ բանակային զորամիավորման ենթակա զորամասերից մեկը նշեց կազմավորման 18-րդ տարեդարձը: Տոնական հանդիսությանը մասնակցելու համար սպարապետ Վազգեն Սարգսյանի անունը կրող զորամաս էին այցելել պաշտպանության նախարար Սեյրան Օհանյանը, բնապահպանության նախարար Արամայիս Գրիգորյանը, ԱԺ պատգամավորներ, բարձրաստիճան սպաներ և քաղաքացիական հատուկ ծառայողներ:

Տոնական միջոցառումները մեկնարկել են Վազգեն Սարգսյանի անվան զորամասում: Զորամասում կայացել է մարզադահլիճի բացման արարողությունը: Հյուրերի ուշադրությանն են ներկայացվել ռազմական թեքվանդոյի ֆեդերացիայի սաների ցուցադրական համարները:

Հանդիսությունը շարունակվել է քաղաքի հրապարակում, որտեղ վաղ առավոտից բնակիչները սպասում էին տոնական զորահանդեսի մեկնարկին: Զորահանդեսը բացել է բանակային զորամիավորման հրամանատար, գեներալ-մայոր Անդրանիկ Մակարյանը: Հրապարակ են բերվել ՀՀ պետական դրոշը, գնդի և հրետանայաին դիվիզիոնի մարտական դրոշները:

Սեյրան Օհանյանը գերատեսչական մեդալներով և թանկարժեք նվերներով է պարգևատրել ծառայության ընթացքում աչքի ընկած զինծառայողների և սպաների, նաև մի շարք քաղաքացիական անձանց զինված ուժերի հետ համագործակցելու համար: Այնուհետև պարգևներ են հանձնվել Երկրապահ կամավորական միության կողմից ևս: Հանդիսավոր միջոցառումը եզրափակվել է զորամասի ստորաբաժանումների շարասյուների շքերթով և տոնական համերգով:

Զորամասը կազմավորվել է 1996 թ.-ին: Առաջին հրամանատարն է եղել «Մարտական խաչ» 2-րդ աստիճանի շքանշանի ասպետ, գնդապետ Մուրադ Կիրակոսյանը: Զորամասի ներկայիս հրամանատարն է Մարտական ծառայության մեդալակիր, գնդապետ Արթուր Օհանյանը: Այս մասին հայտնում է ՊՆ կայքը: