Լավրովն Ուկրաինայի հարցով կոչ է արել ԱՄՆ-ին և ԵՄ-ին

Ռուսաստանն արդարացված չի համարում պաշտոնական Կիևի որոշումը՝ Ուկրաինայում անցկացնել նախագահական ընտրություններ երկրում բռնության ուժգնացման պայմաններում: Այս մասին այսօր հայտարարել է Ռուսաստանի արտգործնախարար Սերգեյ Լավրովը:

Lenta.ru-ի տեղեկացմամբ՝ Լավրովը նշել է, որ իրավիճակի հանդարտեցման համար առաջին քայլը պետք է լինի հրամանը, որով կդադարեցվի հանրապետական զինված ուժերի ստորաբաժանումների և ազգային գվարդիայի կիրառումը երկրի արևելքում ծայր առած բողոքի ակցիաները ճնշելու համար:

Լավրովն ասել է, որ Մոսկվան պատրաստ է աջակցել Կիևի և Ուկրաինայի մարզերի միջև երկխոսության կազմակերպմանը: Լավրովը նաև կոչ է արել ԱՄՆ-ին և Եվրամիությանը` միանալ այդ գործընթացին և ոչ թե գործածել «առաջացած հակասությունները՝ սեփական միակողմանի օրակարգը, սեփական միակողմանի շահերն առաջ տանելու համար՝ մոռանալով ամբողջ ուկրաինացի ժողովրդի շահերի մասին»: