Հայաստանն իրավասու չէ միջամտել այլ երկրի ներքին գործերին. Հովիկ Աբրահամյանը՝ Քեսաբում տիրող իրավիճակի մասին

Այսօր ԱԺ հերթական քառօրյայի նիստում ԱԺ «Ժառանգություն» խմբակցության պատգամավոր Թևան Պողոսյանը հարց ուղղեց ԱԺ նախագահին: Նա մատնանշեց մամուլի տեղեկություններն այն մասին, որ Թուրքիան ռազմական գործողություններ է սկսել Սիրիայի հայաբնակ վայրերում` ստիպելով մարդկանց տարհանվել:

«Մենք սկսում ենք կորցնել արևելքի հին համայնքներից մեկը: Ի՞նչ գործողություններ եք ծրագրում անել այս խնդրի կապակցությամբ: Միգուցե համատեղ քննարկենք խնդիրը արտաքին գործերի նախարարության հետ»,- ասաց Թևան Պողոսյանը:

Հիշեցնենք, որ մարտի 21-ի վաղ առավոտյան թուրքական զինված խմբավորումները անցել էին թուրք-սիրիական սահմանը և հարձակվել Քեսաբի և մյուս հայաբնակ գյուղերի վրա: Մարտի 22-ի երեկոյան Քեսաբի գյուղերի բնակչությունն ամբողջությամբ տարհանվել էր Լաթաքիա:

ԱԺ նախագահ Հովիկ Աբրահամյանը նշեց, որ բոլորն են մտահոգված այդ խնդրով, սակայն Հայաստանը իրավասու չէ միջամտել այլ երկրի ներքին գործերին:

«Գործողությունների ծրագրի մասին խոսելն ավելորդ է: Ճիշտ կլինի այստեղ հրավիրենք արտգործնախարարին, ով կներկայացնի իրավիճակը Սիրիայի հայաշատ վայրերում»,- ասաց Հովիկ Աբրահամյանը: