Ռուբեն Հայրապետյանը հանդիպել է Յուրի Վարդանյանի հետ. մամուլի քարտուղարը հաստատեց

Արդեն սկսվել է Հայաստանի` տարվա լավագույն մարզիկին որոշելու քվեարկությունը, որն անցկացվում է Հայաստանի մարզական լրագրողների ֆեդերացիայի կողմից: Այս անգամ լավագույնի կոչմանը հավակնող թեկնածուներին որոշել է ՀՀ սպորտի և երիտասարդության հարցերի նախարարությունը: Եվ որքան էլ զարմանալի է, ներկայացված ցուցակոմ չի ընդգրկվել որևէ ֆուտբոլիստի անուն: Armsport.am-ին հայտնի է դարձել, որ ՀՖՖ նախագահ Ռուբեն Հայրապետյանին խիստ վրդովեցրել է այդ փաստը, և նա անձամբ է այցելել սպորտի նախարարություն՝ պարզաբանում ստանալու:

Yerkir.am-ի հետ զրույցում սպորտի եւ երիտասարդության հարցերի նախարարի մամուլի քարտուղար Սյուզի Բադոյանը հաստատեց, որ ՀՖՖ նախագահ Ռուբեն Հայրապետյանը հանդիպել է նախարարի հետ: «Ինձ համար զարմանալի է լրագրողների տարակուսանքը եւ զարմանքն այդ հանդիպման վերաբերյալ: Միգուցե ոմանց համար դա նոր երեւույթ է, որ ֆուտբոլի ֆեդերացիայի նախագահը կարող է գալ սպորտի եւ երիտասարդության հարցերի նախարարություն եւ հանդիպում ունենալ նախարարի հետ, բայց քանի որ նախարարը Յուրի Վարդանյանն է, կարծում եմ, այդ առումով զարմանքն արդարացված չէ»,- նշեց Սյուզի Բադոյանը:

Նախարարի մամուլի քարտուղարը համարում է, որ Ռուբեն Հայրապետյանի այցը չարժե կապել այս կամ այն իրադարձության հետ, ֆեդերացիայի նախագահը կարող է քննարկումներ ունենալ նախարարի հետ ոլորտին վերաբերող ցանկացած հարցի շուրջ: