Շանթ Հարությունյանը ոստիկանապետի կողմից ծեծվելու վերաբերյալ հայտարարություն կանի

Նոյեմբերի 5-ի գործով կալանավորված Շանթ Հարությունյանի պաշտպան Իվետա Պետրոսյանը կբողոքարկի ՀՔԾ-ի որոշումը, եթե իր պաշտպանյալը ցանկանա ցուցմունք տալ և խոսել դեպքի մասին:

Հիշեցնենք, որ ԱԺ պատգամավոր Նիկոլ Փաշինյանը հաղորդում էր ներկայացրել ՀՔԾ, որ նոյեմբերի 5-ին ՀՀ ոստիկանության Կենտրոնական բաժին բերման ենթարկված Շանթ Հարությունյանի և Վարդան Վարդանյանի նկատմամբ ՀՀ ոստիկանության պետ Վլադիմիր Գասպարյանն ու նրա առաջին տեղակալ Հունան Պողոսյանը բռնություն են կիրառել, սպառնացել, հայհոյել: Սակայն նոյեմբերի 20-ին ՀՔԾ-ն մերժել էր ԱԺ պատգամավորի հաղորդման հիման վրա գործ հարուցել:

Փաստաբանի խոսքով` իր պաշտպանյալը դեռևս չի ցանկանում այդ մասին խոսել, սակայն իր հետ զրույցում միաժամանակ նշել է, որ դրա կապակցությամբ հայտարարությամբ հանդես կգա:

Նշենք, որ Շանթ Հարությունյանը չի ընդունում  իրեն առաջադրված մեղադրանքը, մինչ այժմ դեպքի առնչությամբ որևէ ցուցմունք չի տվել:

Ըստ պաշտպանի` Շանթ Հարությունյանի հարազատներին արգելված է տեսակցել նրան:

Հիշեցնենք, որ պաշտպանը` Շանթ Հարությունյանին դատահոգեբուժական փորձաքննության ենթարկելու`  առաջին ատյանի դատարանի որոշումը բողոքարկել է ՀՀ Վերաքննիչ դատարանում: Մոտ օրերս հայտնի կդառնա այդ գործով դատական նիստի օրը: