Ես դժգոհող չեմ. արդեն սեղմել եմ հաղթողի ձեռքը. Հովիկ Հովեյան

Ինչպես արդեն տեղեկացրել էինք` երեկ ՀԳՄ նախագահ ընտրվեց Էդվարդ Միլիտոնյանը:

yerkir.am-ի հետ զրույցում ՀԳՄ նախագահի թեկնածու Հովիկ Հովեյանը նշեց, որ ինչպես խոստացել էր, երբ պարզվեց հաղթողի անունը, սեղմեց նրա ձեռքը եւ մաղթեց կառուցողական ու ստեղծագործական աշխատանք:

«Դժգոհողներ շատ կլինեն, ես դժգոհող չեմ»,-ասաց Հովեյանը:

Ըստ նրա, ՀԳՄ կանոնադրության մեջ որոշ դրույթներ կան, որոնք իրապես շտկվելու կարիք ունեն:

«Սա ընդունեցին մեր վարչության եւ նախագահության անդամները: Մենք իբրեւ հասարակական կազմակերպություն` ուղղակի պարտավոր ենք օրենքի կետը պահել, եւ եթե որոշակի անհամապատասխան դրույթներով ենք մտնում համագումար, այս դեպքում դժգոհությունների, բողոքների, կասկածների առիթ ենք տալիս: Կարծում եմ` մեր վարչությունն ու նախագահությունը հետայսու պիտի համագումար սկսեն` իրավական դաշտը մաքուր պահելով»,-ասաց Հովեյանը` հավելելով, որ առաջիկայում անհրաժեշտ է համագումար հրավիրել եւ այս հարցերը քննարկել: