Մեքսիկական քաղաքներից մեկի քաղաքապետը ինքնասպան է եղել

Մեքսիկայի Տեպետոնգո քաղաքի քաղաքապետը` 59-ամյա Ֆիլեմոն Կառլոս Ռոբլեսը, ինքնասպանություն է գործել սեպտեմբերի 30-ին. տեղեկացնում է Newsru.com-ը:

Տեղական ժամանակով 8.30-ին աշխատանքի գալով` նա անմիջապես գնացել է իր ենթաբաժինը, որտեղ անվտանգության ծառայության երկու աշխատակիցներից վերցրել է զենքերը` իբր ստուգելու նպատակով, ապա, առանց բացատրություններ տալու, ատրճանակը պահել իր գլխին և սեղմել ձգանը:

Նահանգապետ Միգել Ալոնսո Ռեյեսի խոսքով` ականատեսները և տեսախցիկները վկայում են, որ տեղի ունեցածն ինքնասպանություն է: Կարծիք կա, որ հոգեբանական ոչ կայուն վիճակի պատճառ կարող է լինել չորս տարի առաջ նրա որդու առևանգումը, ում ազատ են արձակել միայն փրկագին ստանալուց հետո:

Մեքսիկական իշխանությունները սպասում են դատաբժշկական հետազոտությունների արդյունքներին: