Արա Աբրահամյանը ՄՄ-ին միանալու որոշմանը չի միջամտել

Ռուսաստանի հայերի միության նախագահ Արա Աբրահամյանը Երևանում է : Yekir.am-ի տեղեկություններով` նա այստեղ է ժամանել` ԱԺ պատգամավոր Սամվել Ալեքսանյանի երեխաների կնունքին մասնակցելու:

Իսկ այսօր էլ նա հանդիպում է ունեցել ՀՀ նախագահ Սերժ Սարգսյանի հետ: Սակայն հանդիպումն աշխատանքային չի եղել: Քիչ առաջ  yerkir.am-ի լրագրողի հետ զրույցում Արա Աբրահամյանը նշեց, որ ինքը Հայաստան է եկել` բարեկամական մեծ խնջույքի մասնակցելու,  իսկ Սերժ Սարգսյանի հետ այսօրվա հանդիպումն անձնական բնույթ է ունեցել:  

Հարցին` արդյո՞ք Մաքսային միության վերաբերյալ խոսակցություն եղել է, Ա. Աբրահամյանը պատասխանեց` ոչ:

Արա Աբրահամյանը հերքեց նաև այն փաստը, որ ինքը և Սերժ Սարգսյանը մինչ նախագահի`  Մաքսային միությանն անդամակցելու մասին հայտարարություն անելը հանդիպել են Խորվաթիայի իր ամառանոցում:

Հիշեցնենք, որ մամուլում տեղեկություն էր տարածվել, որ Սարգսյանը խնդրել է Աբրահամյանին՝ հանդիպում կազմակերպել իր և Պուտինի միջև: Արա Աբրահամյանն էլ Սարգսյանին հրավիրել Է Խորվաթիայում գտնվող իր առանձնատուն, որտեղ Սերժ Սարգսյանին հաղորդել է Պուտինի մեսիջները՝ կապված Մաքսային միությանը միանալու հետ։