Ծխախոտի տուփերին պետք է նշվի դրանց գինը

Կառավարությունն իր այսօրվա նիստում հավանության արժանացրեց ՀՀ-ում ծխախոտի արտադրանքի առավելագույն մանրածախ գնի մակնշման կարգը սահմանելու մասին որոշման նախագիծը:

Ըստ որոշման` ծխախոտի արտադրանքի մանրածախ վաճառքի առավելագույն գինը պետք է մակնշվի մանրածախ վաճառվող ծխախոտի տուփերի վրա:

«2014 թվականի հունվարի 1-ից ուժի մեջ է մտնելու օրենքի այն դրույթը, համաձայն որի` ծխախոտը, որը վաճառքում իրացվելու է, տուփին պետք է ունենա պարտադիր մակնշում` ծխախոտի գնի վերաբերյալ: Եվ վաճառվող ծխախոտից հավաքագրվող հարկերը հաշվարկվելու են հենց տուփի վրա մակնշվող գնի հիման վրա»,- որոշման նախագիծը ներկայացնելու ժամանակ ասաց ՀՀ ֆինանսների նախարար Դավիթ Սարգսյանը: