Քրդերը զինված հարձակում են գործել ասորիների գյուղի վրա

Ասորիների միջազգային http://www.aina.org կայքը տեղեկացնում է, որ երեկ երեկոյան զինված քրդերը հարձակվել են ասորիների Ռաբատկի գյուղի վրա, որը գտնվում է Հյուսիսային Իրաքում: Հարձակման նպատակը եղել է նրանց հողերը զավթելը: Ասորիները, հասկանալով, որ իրենց վրա հարձակվում են, անմիջապես մեքենաներով փակել են ճանապարհը, ինչի շնորհիվ կանխել են քրդերի մուտքը դեպի իրենց գյուղ: 

Այդ քայլը խիստ բարկացրել է քրդերին: Նրանք հետ են գնացել, սակայն մեկ ժամից էլ քիչ ժամանակահատվածում վերադարձել են 7 մեքենայով` Կալաշնիկովի ինքնաձիգներով զինված: Մարտ է բռնկվել գյուղացիների եւ քրդերի միջեւ, որը դադարել է այն ժամանակ, երբ ոստիկանությունն է ժամանել գյուղ: 

Նշենք, որ 1992 թվականից, դատարանի որոշմամբ, այդ տարածքը պատկանում է ասորիներին: