Կադրային փոփոխությունները շարունակվելու են

Հատուկ քննչական ծառայության նորանշանակ պետ Վահրամ Շահինյանը երեկ պաշտոնանկ է արել միանգամից չորս հոգու՝ Հեկտոր Սարդարյանին, Արիստակես Երեմյանին, Վարդան Հարությունյանին ու Կամո Խաչատրյանին: Ճիշտ է, ըստ պաշտոնական հաղորդագրության՝ այդ մարդիկ աշխատանքից ազատվել են սեփական դիմումի համաձայն: Սակայն ակնհայտ է, որ այստեղ ինչ-որ բան այն չէ:

Հարցն այն է, որ Հ. Սարդարյանը համարվում է բոլորովին վերջերս ՀՔԾ պետի պաշտոնից ազատված Անդրանիկ Միրզոյանի մտերիմը: Բացի այդ, նույն Սարդարյանը հոկտեմբերի 27-ի գործով քննիչներից մեկն է և բազում այդպիսի աղմկահարույց գործեր է քննել: Իսկ Ա. Երեմյանի անունը հայտնի դարձավ մարտի 1-ից հետո կալանավորված, «Սասուն» ջոկատի հրամանատար Սասուն Միքայելյանի գործով. նա Միքայելյանին և շատերին հանիրավի բանտարկության ուղարկեց: Ինչևէ, «Ժողովուրդ»-ին տեղեկություններ են հասել, որ ՀՔԾ-ում էլի են կադրային փոփոխություններ լինելու. Շահինյանին այդ քարտ բլանշը տրված է: