ԵԽԽՎ պատվիրակները ետնամուտքից հեռացա՞ն

Քիչ առաջ «Արմենիա Մարիոթ» հյուրանոցի դիմաց  ավարտվեց Հայ ազգային կոնգրեսի երիտասարդական միության նախաձեռնությամբ կազմակերպված  բողոքի ակցիան: Ցուցարարները, ովքեր բողոքում էին  ԵԽԽՎ-ի՝ Հայաստանում տեղի ունեցող դեպքերի ոչ համաչափ արձագանքից, հյուրանոցի մուտքի առջև սպասում էին եվրոպացի պատվիրակներին, ովքեր, համենայն դեպս, գլխավոր մուտքից դուրս չեկան:

ՀԱԿ ակտիվիստները վստահեցնում են, որ եվրոպացի պատվիրակները  խուսափել են ցուցարարների հետ հանդիպումից և ետնամուտքից են հեռացել: Սակայն նրանք ակցիան ձախողված չեն համարում, ընդհակառակը` պնդում են, որ իրենց հաջողվեց ներկայացնել իրենց պահանջները, եվրոպացիների ուշադրությունը հրավիրել երկրում տիրող խնդիրներին:

Նշենք նաև, որ ԵԽԽՎ Մշտական հանձնաժողովի նիստի ավարտից հետո ՀԱԿ համակարգող Լևոն Զուրաբյանը  զրուցել է ԵԽԽՎ նախագահ Ժան-Կլոդ Մինյոնի հետ եւ տեղեկացրել նրան ընթացող բողոքի ակցիայի մասին: