Նախագահը ներողություն է խնդրել իր մամուլի քարտուղարի վարքագծի համար

Հարավային Կորեայի նախագահ Պակ Կըն Հեն այսօր ներողություն է խնդրել իր մամուլի քարտուղարի մասնակցությամբ սեքսուալ սկանդալի համար: Մամուլի քարտուղարն անցյալ շաբաթ ազատվել էր աշխատանքից:

«Ես ցավում եմ, որ պետական պաշտոնյան նման գործողություններ է իրեն թույլ տվել: Հուսով եմ, որ նախագահական աշխատակազմի եւ այլ հաստատությունների բոլոր աշխատակիցները ավելի պատասխանատու կլինեն իրենց քայլերի համար»,- ասել է նախագահը:

Հարավային Կորեայի նախագահի` ԱՄՆ այցից հետո Վաշինգտոնի ոստիկանությունը բողոք էր ստացել Հարավային Կորեայի դեսպանատան աշխատակցուհուց, որ նախագահի մամուլի քարտուղար Յուն Չան Չժուն իրեն անվայել պահվածք է թույլ տվել: Ավելի ուշ մամուլի քարտուղարը թեեւ ներողություն է խնդրել, սակայն իրեն մեղավոր չի ճանաչել սեռական ոտնձգություն անելու մեջ` հավելելով, որ թյուրըմբռնում է եղել տարբեր մշակույթների պատճառով: