Քաղաքի տարբեր համայնքներում պոկում են ''Բարև Երևան''-ի պաստառները

Երևանի տարբեր համայնքներում պոկում են «Բարև Երևան» դաշինքի քարոզչապաստառները. լրագրողների հետ հանդիպման ժամանակ մտահոգված հայտնեց Երևանի ավագանու ընտրություններում «Բարև Երևան» դաշինքը ներկայացնելող Արմեն Մարտիրոսյանը:

Նրա խոսքով` ամենուրեք ընտրախախտումներ են: «Օրինակ` Նաիրի Զարյանի անունը կրող թիվ 130 միջնակարգ դպրոցի ճակատային մասում փակցված է Երևանի քաղաքապետ Տարոն Մարգարյանի պաստառը»,- ասաց նա և հավելեց, որ որոշ քաղաքական ուժերի արդեն ընտրակաշառք են բաժանում:

Թեև, ինչպես նշեց «Ժառնագության» ներկայացուցիչը, նախընտրական շրջանում սև PR է իրականացվել «Բարև Երևան» դաշինքի դեմ, սակայն դա չի խոչընդոտի, որ այս ընտրություններում իրենք 40% ձայն հավաքեն:

Անդրադառնալով «Բարև Երևանի» մայիսմեկյան սակավամարդ հանրահավաքին` Մարտիրոսյանն ասաց. «Մենք գործարարներ չունենք, ովքեր ավտոբուսներով մարդիկ բերեն հանրահավաքին: Բացի այդ` կարևոր չէ հանրահավաքի մարդկանց թիվը, կարևորը` թե որքան մարդ է ընտրում մեզ»: