Ամերիկացիներին վախեցրել է երկնքում հայտնված հրե գունդը

Ուրբաթ օրը` ուշ երեկոյան, բազմաթիվ ամերիկացիներ Նյու Յորքում, Վաշինգտոնում եւ ԱՄՆ արեւելյան ափի այլ քաղաքներում հսկայական հրե մարմին են տեսել երկնքում: Վայրկյաններ անց սոցիալական ցանցերում  տեղեկություններ են տարածվել «հրե գնդի», «պայծառ բռնկման» մասին, նաեւ` կատարվածի տարբեր վարկածներ:

Որոշ օգտատերերի կարծիքով` դա հզոր հրավառություն է եղել, ոմանք էլ համարում են, որ գիսաստղի հետք է: Եղել են նաեւ աշխարհի վերջի վարկածներ:

Սակայն, ըստ ԱՄՆ օդերեւութաբանական ծառայության աշխատակից Ռոբերտ Լանդֆորդի, ամենայն հավանականությամբ, դա երկնաքար է, որն առաջացել է աստղակերպի կամ գիսաստղի մնացորդների այրումից:

ԱՄՆ օդային-տիեզերական պաշտպանության հրամանատարությունը հայտարարել է, որ երկնքում բռնկումները մարդկային գործունեության արդյունք չեն: