Ճապոնիան աջակցում է Մինսկի խմբին

Փետրվարի 1-ին Հայաստանի և Ճապոնիայի արտաքին գործերի գերատեսչությունների միջև անցկացվեցին քաղաքական խորհրդակցություններ, որոնք վարում էին հայկական կողմից` ՀՀ ԱԳ նախարարի տեղակալ Սերգեյ Մանասարյանը, իսկ ճապոնական կողմից` Ճապոնիայի արտաքին գործերի նախարարության Կովկասի հարցերով հատուկ ներկայացուցիչ, Ճապոնիայի ԱԳՆ Եվրոպայի հարցերի բյուրոյի գլխավոր տնօրենի տեղակալ, դեսպան Տակեշի Հիկիհարանին:

Ինչպես հայտնում է ԱԳՆ մամուլի ծառայությունը, կողմերը քննարկել են միջազգային կազմակերպություններում համագործակցության ակտիվացմանը, տնտեսական համագործակցության խթանմանը, իրավապայմանագրային դաշտի ընդլայնմանը վերաբերող հարցեր: Տեղի է ունեցել մտքերի փոխանակում միջազգային և տարածաշրջանային հարցերի շուրջ: Ճապոնական կողմին ներկայացվել են Լեռնային Ղարաբաղի հիմնախնդրի կարգավորման գործընթացի վերաբերյալ հայկական կողմի մոտեցումները:

Այնուհետև, ճապոնական պատվիրակության ղեկավար Տակեշի Հիկիհարանը ԱԳ նախարար Էդվարդ Նալբանդյանի հետ հանդիպման ժամանակ վերահաստատել է, որ Ճապոնիան աջակցում է ԵԱՀԿ Մինսկի խմբի եռանախագահների ջանքերին ուղղված հիմնախնդրի բացառապես խաղաղ կարգավորմանը՝ միջազգային իրավունքի երեք հայտնի սկզբունքների հիման վրա: