Հայաստանում կկազմակերպվեն ուկրաինական մշակույթի եւ կինոյի օրեր

2013-2017թթ. Հայաստանը եւ Ուկրաինան մշակութային ոլորտում սերտ կհամագործակցեն: Այսօր ՀՀ մշակույթի նախարար Հասմիկ Պողոսյանը եւ ՀՀ-ում Ուկրաինայի արտակարգ եւ լիազոր դեսպան Իվան Կուխտան կնքել են համաձայնագիր, ըստ որի` կողմերն առաջիկա տարիներին կաջակցեն ստեղծագործական կոլեկտիվների և անհատ կատարողների փոխանակումներին:

Yerkir.am-ին ՀՀ մշակույթի նախարարության հասարակայնության հետ կապերի վարչությունից տեղեկացրին, որ, ըստ ծրագրի, կողմերը նաեւ կապահովեն մասնակցությանը երկու երկրներում անցկացվող միջազգային փառատոներին եւ մրցույթներին, կստեղծեն բարենպաստ պայմաններ կերպարվեստի, կինեմատոգրաֆիայի, գրադարանային և թանգարանային գործի, պատմամշակութային ժառանգության օբյեկտների, ժողովրդական արհեստների պահպանման բնագավառում համագործակցության զարգացման համար. «Փոխադարձաբար կկազմակերպվեն մշակույթի, կինոյի օրեր, կիրականացվեն ցուցահանդեսների փոխանակումներ: Կինոն, թատրոնը, գրականությունը նույնպես ուշադրության կենտրոնում կլինի»: