Սիրիական ճգնաժամից դուրս գալու ռազմական ճանապարհը բացառվում է

Հունվարի 11-ին Ժնեւում ՄԱԿ-ի եւ Արաբական պետությունների լիգայի հատուկ պատվիրակ Լահդար Բրահիմին անցկացրել է խորհրդակցությունների երկրորդ փուլը ՌԴ նախագահի մերձավորարեւելյան հարցերով հատուկ ներկայացուցիչ, ՌԴ փոխարտգործնախարար Միխայիլ Բոգդանովի եւ ԱՄՆ պետաքարտուղարի տեղակալ Ուիլյամ Բըրնսի հետ. տեղեկացնում է REGNUM-ը:

Հանդիպման մասնակիցներն ընդգծել են 2012 թ. հունիսի 30-ին ընդունված Ժնեւյան փաստաթղթի հիման վրա քաղաքական որոշման հասնելու կարեւորությունը:

Հանդիպումից հետո Բրահիմին հանդես է եկել հայտարարությամբ, ըստ որի` խորհրդակցությունների մասնակիցները համակարծիք են, որ սիրիական ճգնաժամից դուրս գալու ռազմական ճանապարհը բացառվում է: «Բոլորս խորությամբ գիտակցում ենք, որ սիրիացի ժողովրդի տառապանքները շատ ձգվեցին: Բոլորս ընդգծեցինք, որ անհրաժեշտ է անհապաղ դադարեցնել արյունահեղությունը, ավերածությունները եւ բռնության բոլոր ձեւերը Սիրիայում»,- ասել է նա` հավելելով, որ կշարունակի բանակցությունները Սիրիայի կառավարության եւ ընդդիմության հետ: