Մեծ Բրիտանիան հանրաքվե է անցկացնելու ԵՄ-ի հետ հարաբերությունների հարցով

Մոտակա 5 տարիների ընթացքում Մեծ Բրիտանիան հանրաքվե է անցկացնելու Եվրամիության հետ հարաբերությունների հարցով. երեկ հայտարարել է երկրի վարչապետ Դեւիդ Քեմերոնը BBC-ի եթերում:

Նա հրաժարվել է հայտնել, թե հարցաթերթիկում ԵՄ-ից դուրս գալու կոնկրետ` «այո» կամ «ոչ» պատասխան կլինի՞: Միաժամանակ, վարչապետը հասկացրել է, որ կառավարությունը ներկայումս հատուկ ծրագիր է մշակում Բրյուսելի հետ հարաբերությունների վերաբերյալ. Լոնդոնը փորձելու է վերականգնել ազգային խորհրդարանի ինքնիշխան լիազորությունների մի մասը, որոնք փոխանցվել էին ԵՄ միասնական մարմիններին:

Փորձելով հաղթահարել ծանր ֆինանսական ճգնաժամը` Եվրամիությունը պատրաստվում է ինտեգրման նոր փուլի, որի նպատակն է մշակել միասնական տնտեսական քաղաքականություն եւ ստեղծել եվրոյի գոտու դաշնային տնտեսական կառավարություն: Լոնդոնը, սակայն, չի պատրաստվում մասնակցել դրան, ավելին` մտադիր է դուրս գալ ԵՄ մի շարք միասնական ոլորտներից, որպեսզի ուժեղացնի ազգային խորհրդարանը: