Բրահիմին սիրիացի ընդդիմադիրներին նոր առաջարկներ է ներկայացրել

ՄԱԿ-ի եւ Արաբական պետությունների լիգայի հատուկ պատվիրակ Լահդար Բրահիմին բանակցություններ է վարել սիրիական ընդդիմության 6 ներկայացուցիչների հետ. տեղեկացնում է France Presse-ը:

Նա ներկայացրել է նոր նախաձեռնություն` ուղղված սիրիական ճգնաժամի լուծմանը: Բրահիմին այդ նախաձեռնությունը համաձայնեցրել է ԱՄՆ եւ ՌԴ պաշտոնական անձանց հետ նախորդ շաբաթ Ժնեում տեղի ունեցած հանդիպումների ժամանակ:

Նոր առաջարկները նախատեսում են անցումային կառավարության ձեւավորում, որի նախարարները ո'չ ալեւիներ կլինեն, ո'չ էլ` ծայրահեղական սուննիներ: Ըստ նախաձեռնության` Սիրիայի նախագահ Բաշար Ասադը պահպանում է իշխանությունը մինչեւ 2013 թվականի երկրորդ կեսը, սակայն իրավունք չի ունենա իր թեկնածությունն առաջադրել 2014-ի նախագահական ընտրություններում:

Հիշեցնենք, որ Բրահիմին ավելի վաղ հանդիպել է Ասադի հետ: «Ես պատիվ եմ ունեցել հանդիպելու նախագահի հետ եւ, ինչպես միշտ, մենք կարծիքներ ենք փոխանակել շատ հարցերի վերաբերյալ, որոնք ապագայում պետք է լուծվեն»,- ասել է նա:  

Բրահիմին հույս է հայտնել, որ կողմերը գործունակ լուծում կգտնեն, որը կմիավորի սիրիացի ժողովրդին: