Հայաստանը հավատարիմ է ԵՍԶՈՒ պայմանագրի նպատակներին ու ոգուն

Նախագահ Սերժ Սարգսյանն այսօր ընդունել է ԱՄՆ պետքարտուղարի` սպառազինությունների վերահսկման, հավաստագրման և համապատասխանության հարցերով  օգնական Ռոուզ Գոթեմյոլերին. տեղեկացնում է ՀՀ նախագահի մամուլի գրասենյակը:

Նախագահն ընդգծել է, որ Հայաստանը շարունակում է Եվրոպայում սովորական զինված ուժերի (ԵՍԶՈՒ) պայմանագիրը դիտարկել որպես Եվրոպայում անվտանգության և կայունության հիմնասյուներից մեկը և հավատարիմ է պայմանագրի նպատակներին ու ոգուն: Հանրապետության ղեկավարի խոսքով` մեր երկիրը կշարունակի լիարժեք կերպով իրականացնել պայմանագրով ստանձնած պարտավորությունները` կարևորելով Հարավային Կովկասի տարածաշրջանում սպառազինությունների վերահսկման ոլորտում հիշյալ փաստաթղթով սահմանված պարտավորությունների կատարումը, որի խախտումն արդեն իսկ լուրջ վտանգ է դարձել ամբողջ տարածաշրջանի համար: