Թուրքիան մտադիր չէ միայնակ քաշել "Նաբուկո"-ի լուծը

Թուրքիան մտադիր չէ միայնակ պատասխանատվություն կրել "Նաբուկո" նախագծի իրականացման համար. հայտարարել է երկրի էներգետիկայի նախարար Թաներ Յըլդըզը:

Ըստ թուրքական ԶԼՄ-ների` նա նշել է, որ նախագծին մասնակցում է 6 գործընկեր, եւ գազատարի շինարարությունը բոլորի պարտականությունն է: «Իհարկե, «Նաբուկո»-ի իրագործման համար մենք կանենք ինչ անհրաժեշտ է, սակայն արտադրող եւ մատակարար երկրներ միայնակ փնտրել չենք պատրաստվում»,- ասել է նախարարը:

Նա նաեւ հայտարարել է, որ «եթե ԵՄ-ն նոր էներգետիկ գլուխ չբացի Թուրքիայի հետ անդամակցության բանակցություններում, Անկարան դրանից ոչինչ չի կորցնի»:

«Մենք ոչ ոքի ոչինչ չենք խնդրի: Մենք ունենք մեր ռազմավարություն, որի շրջանակներում իրագործում ենք մեր նախագծերը: Ամեն դեպքում` Թուրքիան կորցնող կողմ չի լինի»,- ընդգծել է Յըլդըզը: