«Նաբուկո»-ն հեռացնում է մեզ Եվրոպայից եւ Ռուսաստանից

«Մենք, ըստ էության ավելի ու ավելի հեռանում ենքԵվրոպայից եւ մեր ռազմավարական գործընկեր Ռուսաստանից»,- այսօր լրագրողների հետ հանդիպման ժամանակ ասաց քաղաքագիտության դոկտոր Լեւոն Շիրինյանը` անդրդառնալով «Նաբուկո» գազատարի կառուցման վերաբերյալ Եվրամիության եւ Ադրբեջանի միջեւ կնքված պայմանագրին:

Նրա խոսքով, դեռեւս խորհրդային տարիներին, երբ որեւէ նախագծի մասին խոսում էին, այն նախ առասպելանման էր թվում,  անիրականանալի, իսկ հետո իրականություն էր դառնում: Նույնն էլ այս դեպքում է, եւ մեր պետությունը պետք է համապատասխան քայլեր անելու մասին մտածի:

«Նաբուկո» նախագիծը երկու ճյուղավորում է ունենալու` Ադրբեջանից Վրաստան-Ուկրաինա-Լեհաստան եւ Վրաստան-Թուրքիա-Հունաստան-Իտալիա:

Ըստ քաղաքագետի` նախագիծը ենթադրում է նաեւ միջինասիական էներգետիկ պաշարների օգտագործում, քանի որ Ադրբեջանի պաշարները բավարար չեն եվրոպայի պահանջարկը բավարարելու համար:

«Մեր երկիրը տեղակայված է նավթամուղ-գազամուղների կողքին եւ ռազմավարական իմաստով հսկող դիրք ունի: Հայաստանն ու Արցախը կախված են այդ ճյուղավորումների վրա»,- ասաց Լեւոն Շիրնյանը:

Նրա խոսքով` ՀՀ արտաքին քաղաքականության մեջ պետք է տեղաշարժ արվի նաեւ դեպի Իրան եւ Հարավ-արեւելյան Ասիա: Եվ պետք է հավասարակշռություն ստեղծել Եվրոպայի եւ Ասիայի միջեւ: