Հաղթեցինք` խաղով, պարտվեցինք` հաշվով

Իտուրալդե Գոնսալես, այսպես է այն մարդու անունը, ով իր ուսերի վրա վերցրեց հայկական ֆուտբոլի դահիճի պարտականությունը:

Իսպանացի մրցավարը, չգիտես ինչու, հանդիպման 27-րդ րոպեին ձեռքով խաղ տեսավ Բերեզովսկու գործողություններում և հեռացրեց մեր դարպասապահին:

10 հոգով մնացած Հայաստանի հավաքականը շարունակ ճնշում էր մրցակցին, սակայն 43-րդ րոպեին մեր պաշտպան Վալերի Ալեքսանյանը գնդակն ուղարկեց սեփական դարպասը, և իռլանդացիները անսպասելիորեն առաջ անցան հաշվի մեջ:

Երկրորդ կեսում Հայաստանի հավաքականը շարունակեց խաղալ նույն ոգով, բայց կրկին անտրամաբանական գնդակ հայտնվեց մեր ցանցում: Այս անգամ սխալվեց փոխարինման դուրս եկած 20-ամյա Արսեն Պետրոսյանը:

63-րդ րոպեին Հենրիխ Մխիթարյանը, հիանալի փոխանցում ստանալով Յուրա Մովսիսյանից, կրճատեց հաշվի տարբերությունը:

Հայաստանի հավաքականը պարտվեց մի խաղում, որում արժանի էր միայն հաղթանակի: