Նվեր` Էրեբունի արգելոց-թանգարանին

Էրեբունի արգելոց-թանգարանն այսօր կազմակերպել էր Նյու Յորքում բնակվող մեր հայրենակից Ռոբերտ Կարապետյանի` թանգարանին վերաբերող լուսանկարների ցուցահանդեսը։

Բացման արարողության ժամանակ լուսանկարիչը հայտարարեց, որ ցուցադրված 32 լուսանկարները նվիրաբերում է թանգարանին: Դրանցից 19-ը նա նկարել է 1968 թվականին, իսկ մնացածը` շուրջ 40 տարի անց` 2008 թվականին, Էրեբունի-Երեւանի 2790-ամյակի կապակցությամբ:

«Այս նկարները բավական մեծ տեղեկատվություն են պարունակում: Մեզ համար շատ արժեքավոր են, քանի որ 1968 թվականին մեզ համար բացվեց կարեւոր մի օջախ` հնագիտական թանգարանը եւ արգելոցը: Սրանք մեր թանգարանի պատմությունը լուսաբանող արժեքավոր վկաներ են։ Մենք այսօր լուսանկարները կընդգրկենք մեր գիտաօժանդակ ֆոնդում, եւ դրանք, ըստ էության, կպահպանվեն եւ կօգտագործվեն»,- ասաց թանգարանի տնօրեն Գագիկ Գյուրջյանը: