ՄԱԿ-ը վճիռն է կայացրել "Ազատության նավատորմիղի" վերաբերյալ

ՄԱԿ-ի` «Ազատության նավատորմիղի» վրա իսրայելցի հատուկջոկատայինների հարձակման հարցը քննարկող հանձնաժողովը այսօր ավարտել է իր աշխատանքը: Հրապարակվել է 105 էջից բաղկացած զեկույց, որում տրվում է երկու կողմերի գնահատականը: Փաստաթղթի պատճենն ընկել է The New Times-ի ձեռքը:

Հանձնաժողովը հանգել է եզրակայության, որ իսրայելցիները, գրավելով «Մավի Մարմարա» թուրքական նավը, ստիպված են եղել ուժ կիրառել ինքնապաշտպանության համար, քանի որ հանդիպել են «կազմակերպված եւ զինված դիմադրության»: Սակայն իսրայելցիների կիրառած ուժը գնահատվել է «չափից ավելի եւ չհիմնավորված», իսկ հետագա վերաբերմունքը նավի ուղեւորների նկատմամբ` վիրավորական:

Մյուս կողմից` ՄԱԿ-ը օրինական է համարել Գազայի հատվածի ծովային շրջափակումը Իսրայելի կողմից, որն էլ փորձել է ճեղքել նավատորմը: Զեկույցի հեղինակների կարծիքով` նավի ուղեւորների մեծ մասի նպատակները խաղաղասիրական են եղել, ինչը չի կարելի ասել թուրքական հումանիտար IHH կազմակերպության մասին:

Զեկույցում առաջարկ է արվում Իսրայելին ափսոսանք հայտնել նավի գրավման ժամանակ Թուրքիայի քաղաքացիների մահվան կապակցությամբ եւ փոխհատուցում հատկացնել նրանց ընտանիքներին: Իսրայելին նման ձեւակերպումը ձեռնտու է, սակայն Թուրքիան ներողություն է պահանջում: