"Մաքուր երկաթ"-ն ավելացնում է արտադրական ծավալները

Երեւան քաղաքի մերձակա` Խարբերդի ամառանոցների հարեւանությամբ գործող «Մաքուր երկաթ» գործարանն արտադրում է ֆերոմոլիբդեն, մաքուր մետաղական մոլիբդեն, իսկ ծխագազերից կորզում ռենիում: Արտադրության ընթացքում մթնոլորտ է արտանետվում ծծմբային անհիդրիդ եւ ազոտի օքսիդ, ինչի կապակցությամբ վերջերս իրենց դժգոհությունն էին հայտնել ամառանոցների բնակիչները:

Իսկ հիմա նույն գործարանը մտադիր է ընդլայնել իր արտադրությունը:

Ինչպես տեղեկացնում է ՀՀ բնապահպանության նախարարության պաշտոնական կայքը, 2011 թվականի օգոստոսի 11-ին «Գ. Նազարյան եւ ընկերներ» ՍՊԸ-ն կազմակերպել է հասարակական լսումներ` գործարանի թափոնների` մոլիբդենի, պղնձի, երկաթի միացությունների ստացման արտադրամասի աշխատանքային նախագծի վերաբերյալ:

«Մաքուր երկաթը» վերամշակում է Զանգեզուրի պղնձամոլիբդենային կոմբինատի պղնձամոլիբդենային կոնցենտրատը, որի արդյունքում տարեցտարի ավելանում են Զանգեզուրի պղնձամոլիբդենային կոմբինատի արտադրական ծավալները:

Այս մասին տեղեկացնում է «Էկոլուր» լրատվական կայքը: