Ազատագրված տարածքների չվերաբնակեցումը խոշորագույն բացթողում է

Մենք խոսում ենք ԼՂ խնդրի կարգավորման մասին, բանակցային գործընթացում ինչ-որ դիրքային առավելություններ ենք ուզում ունենալ, բայց վերաբնակեցմանն ուղղված կոնկրետ քաղաքականություն չենք իրականացնում. անդրադառնալով ազատագրված տարածքները վերաբնակեցնելու` «Ժառանգության» երեկվա կոչին` այսօր լրագրողներին ասաց քաղաքագետ Երվանդ Բոզոյանը:

Նա ողջունում է այդ առաջարկը եւ այն համոզման է, որ դա մեր իշխանությունների ամենախոշոր բացթողումներից մեկն է:

«Մենք տեսական ենք դնում ԼՂ խնդիրը, այն առարկայական չենք ընկալում, թե ինչ պետք է անել, որպեսզի մարդիկ կարողանան ապրել այնտեղ: Պետք է տարվեր այնպիսի քաղաքականություն, որպեսզի մարդիկ կարողանային գնալ այնտեղ, ապրել, պետք է բազմաթիվ արտոնություններ տրվեին, որ մարդկանց մեջ հոսք լիներ ոչ թե դեպի Ռուսաստան, այլ ԼՂ: Բայց նման քննարկում հայ հասարակության մեջ ընդհանրապես չկա, եւ դա ինձ համար տարօրինակ է: Մենք պահանջում ենք Ղարաբաղն առանց մարդկանց, իսկ այդպիսի բան չի լինում»,- նշեց քաղաքագետը: