Պատրաստ են ընդդիմության հետ քննարկել ցանկացած ողջամիտ առաջարկ

Հայաստանի իշխանությունները պատրաստ են ընդդիմության հետ քննարկել ցանկացած ողջամիտ առաջարկ եւ նույնիսկ զիջումների գնալ. նման հայտարարությամբ Շիրակի մարզում լրագրողների հետ հանդիպման ժամանակ հանդես է եկել Հայաստանի ԱԺ նախագահ Հովիկ Աբրահամյանը:

«Երկխոսության վերաբերյալ մեր մոտեցումներն առաջիկայում կհնչեցնենք, սակայն ուզում եմ ասել, որ երկխոսության ձեւաչափը մեզ համար ընդունելի է, ու հենց դա է հանդուրժողականությունը»,- ասել է նա` անդրադառնալով ՀԱԿ-իշխանություն հնարավոր երկխոսության թեմային:

ԱԺ խոսնակը հայտնել նաեւ, որ ԱԺ ամբիոնը պատրաստ է դարձնել բազմակարծության ամբիոն:

Ինչ վերաբերում է առաջիկա խորհրդարանական ընտրություններին, նա ասել է, որ իրենք ամեն ինչ անելու են, որպեսզի հաջորդ խորհրդարանական ընտրությունները լինեն ազնիվ, թափանցիկ ու առանց խախտումների: «Ամեն ինչ անելու ենք, որ կոնկրետ ՀՀԿ-ն բարձր տոկոսներ ստանա, որը կլինի մեր աշխատանքի արդյունքը: Իսկ եթե վատ աշխատենք ու ցածր տոկոսներ ստանանք, ուրեմն որեւէ մեկի վրա մեղքը բարդելը տվյալ պարագայում սխալ է»,- նշել է Հ. Աբրահամյանը: