Ավազակային հարձակման է ենթարկվել նախկին թաղապետի ընտանիքը

Այսօր առավոտյան` ժամը 5:30-ի սահմաններում, ավազակային հարձակում է տեղի ունեցել Մալաթիա-Սեբաստիա վարչական շրջանի նախկին թաղապետ Աղվան Գրիգորյանի ու նրա ընտանիքի անդամների նկատմամբ:

Ավազակախմբի բոլոր 3  անդամները եղել են դիմակավորված, նրանցից մեկն, ով հարվածել է Աղվան Գրիգորյանին, նախնական տեղեկություններով, խոսել է Շիրակի բարբառով, այնուհետև սկսել է խոսել ռուսերեն: Բոլորը եղել են սպորտային կառուցվածքով երիտասարդներ:

 Տանտերը, երկու որդիները եւ մայրը ենթարկվել են դաժան ծեծի: Նրանցից պահանջել են չհրկիզվող պահարանի բանալիները, որոնք չստանալուց հետո Աղվան Գրիգորյանին պատկանող BMW X5 մակնիշի 01 ՏՕ 009 համարանիշի ավտոմեքենայով   չհրկիզվող պահարանն առևանգել են:

Մալաթիայի քննչական բաժնում հարուցվել է քրեական գործ` ՀՀ քր.օր-ի 175 հոդվածի հատկանիշներով: Ֆոտոլրագրող Գագիկ Շամշանը տեղեկացնում է, որ նախկին թաղապետին եւ նրա որդիներին տրվել է դատաբժշկի ուղեգիր, ձեռնարկվում են օպերատիվ-քննչական միջոցառումներ` հայտնաբերելու ինչպես ավազակային հարձակում կատարած անձանց, այնպես էլ առեւանգված ավտոմեքենան: