Ֆրանսիայի խորհրդարանը դեմ է միասեռ ամուսնություններին

Ֆրանսիայի Ազգային ժողովը մերժել է ընդդիմադիր Սոցիալիստական կուսակցության ներկայացրած` միասեռ ամուսնությունները օրինականացնող նախագիծը. տեղեկացնում է Associated Press-ը:

Օրինագծին դեմ է քվեարկել Ազգային ժողովի 293 պատգամավոր, կողմ` 222-ը:

Սոցիալիստները հենվում են Մարդու իրավունքների հռչակագրի 1-ին հոդվածին, որի համաձայն` «մարդիկ ծնվում եւ մնում են ազատ ու հավասար իրավունքներով»: Սակայն այս տարի Ֆրանսիայի գերագույն դատարանը վճիռ է կայացրել, ըստ որի` միասեռ ամուսնություններն արգելող օրենքները չեն հակասում երկրի Սահմանադրությանը:

Ներկայումս Ֆրանսիայում համասեռամոլները քաղաքացիական ամուսնություններ են կնքում, որոնք, սակայն, չեն ապահովում ժառանգության իրավունքը եւ սահմանափակում են սեփականության համատեղ իրավունքը: