Գյուղնախարարը խոստումներ է տալիս

Գյուղնախարար Սերգո Կարապետյանը երեկ այցելել էր Տավուշի մարզ եւ ծանոթացել մարզի սահմանամերձ գյուղերում ընթացող գյուղատնտեսական աշխատանքներին: Նա եղել է վերամշակող մի քանի ընկերություններում, հանդիպել գյուղացիների հետ ու վստահեցրել, որ ամբողջ բերքը իրացվելու է ժամանակին եւ առանց խոչընդոտների:

«Երկիր»-ին գյուղնախարարությունից հայտնեցին, որ Տավուշի սահմանամերձ գյուղերում այս տարի ավելացել են ցանքատարածությունները: Այգեգործության զարգացմանը զուգահեռ գյուղատնտեսության նախարարությունն աշխատանքներ է իրականացնում վերամշակող գործարանները վերաբացելու ուղղությամբ. արդեն սկսել է գործել Վարագավանի պահածոների գործարանը: Նախարարը խոստացել է օգնել նաեւ Այգեձորի պահածոների գործարանի վերաբացման հարցում:

Տավուշի մարզում զգալի ներդրումներ են կատարվում գինեգործության զարգացման ուղղությամբ: Նախարարն իր այցելության ընթացքում ծանոթացել է նաեւ Երեւանի կոնյակի գործարանի Բերդի մասնաճյուղի աշխատանքներին: Այնտեղ հավաստիացրել են, որ պատրաստ են գյուղացիներից ընդունել ամբողջ բերքը: