ԺԱՄԱՆԱԿ. Արագածում ընտրական կրքերը չեն հանդարտվում

Արագածոտնի մարզի Արագած համայնքում մայիսի 22-ին անցկացված գյուղապետի ընտրությունների արդյունքները, որոնք խիստ կասկած են առաջացրել գյուղի բնակիչների մոտ, երեկ պարտված թեկնածու Գագիկ Մելքոնյանի կողմից բողոքարկվել են Վարչական դատարանում: Այսօր արդեն դատարանի վճիռը կհրապարակվի, եւ պարզ կլինի` արդյոք անցկացվելո՞ւ են արտահերթ ընտրություններ:

Գյուղացիները ընտրությունից հետո բողոքի ակցիա են անցկացրել իրենց գյուղում՝ Արագածում, եւ Երեւանում՝ նախագահական նստավայրի մոտ: Գյուղացիների խոսքերով` ընտրություններն անցկացվել են ընտրակեղծիքներով, քվեատուփերից հանել են նույնիսկ առանց ծրարի քվեաթերթիկները: Գյուղի 70%-ը դեմ է կեղծիքներով ընտրված գյուղապետին: Գյուղացիներից շատերին սպառնացել են եւ ստիպել ընտրել գործող գյուղապետին: