Բահրեյնի թագաժառանգը չի մասնակցի արքայազն Ուիլյամի հարսանիքին

Պաշտոնական հայտարարության մեջ նշվում է, որ ապագա միապետը չի ցանկանում, որ իր երկրում տիրող անկայուն իրավիճակը ստվեր գցի արքայազնի ամուսնական արարողության վրա:

Արքայազն Ուիլյամի հարսանիքի հրավիրյալների ցուցակի հրապարակումից հետո մի շարք բրիտանական իրավապաշտպան կազմակերպություններ տարակուսանք էին հայտնել Բահրեյնի թագաժառանգին հրավիրելու կապակցությամբ: Սալման ալ Խալիֆը նշել է, որ ցավում է բրիտանական հասարակության և ԶԼՄ-ների արձագանքի համար, որոնք սխալ են մեկնաբանել Բահրեյնում կատարվածի վերաբերյալ իր հայացքները. տեղեկացնում է Sky News-ը:
 

Ի դեպ, հյուրերի ցուցակում մոտ քառասուն միապետի անուն է նշված, այդ թվում` Սաուդյան Արաբիայի, Օմանի, Բրունեյի, Քաթարի, Քուվեյթի, ինչն առաջացրել է իրավապաշտպանների վրդովմունքը: 

Մինչդեռ հարսանիքին չեն հրավիրվել նախկին վարչապետեր Թոնի Բլերը և Գորդոն Բրաունը: Հարսանիքի կազմակերպիչները դա բացատրում են նրանով, որ նրանք, ի տարբերություն պահպանողական սըր Ջոն Մեյջորի և լեդի Մարգարետ Թետչերի, չեն ստացել ազնվական տիտղոսներ: