Ջոն Լորդը չի զղջում, որ լքել է Deep Purple-ը

Deep Purple-ի համահիմնադիր Ջոն Լորդը ИТАР-ТАСС-ին տված հարցազրույցում ասել է, որ  դեռեւս տասը տարի առաջ խմբից հեռանալու իր որոշումը միանշանակորեն ճիշտ է եղել:

«Յուրաքանչյուր մարդ էլ կանգնում է ճամփաբաժանի առաջ եւ ստիպված է լինում ընտրություն կատարել` ա՞ջ, թե՞ ձախ գնալ: Ժամանակի ընթացքում ես պարզապես հասկացա, որ կան բազմաթիվ գործեր, որոնցով զբաղվել եմ ուզում եւ ժամանակ չունեմ` Deep Purple-ի պատճառով»,- ասել է Ջ. Լորդը:

Նա հավելել է, որ հիմա էլ ընկերական հարաբերություններ ունի իր նախկին գործընկերների, այդ թվում` Ռիչի Բլեքմորի հետ, ով իրենից ավելի շուտ էր լքել խումբը: Ավելին, Լորդը չի բացառում, որ Բլեքմորի հետ ֆոլկ կամ սիմֆոռոք ոճի ձայնագրություններ լինեն: