ՀՅԴ-ն կբարձրացնի՞ կառավարությանն անվստահություն հայտնելու հարցը

Երեկ ԱԺ ՀՅԴ խմբակցությունը հարցապնդում է ներկայացրել կառավարությանը, որում հարց է բարձրացվել, թե ինչո՞վ է կառավարությունը բացատրում սոցիալ-տնտեսական ձախողումների պատճառով ստեղծված իրավիճակը, արտագաղթի կասեցման ուղղությամբ քայլեր չձեռնարկելը եւ այս ամենում սեփական մեղքը տեսնո՞ւմ է, թե՞ ոչ:

Այսօր այդ մասին լրագրողներին տեղեկացրեց ՀՅԴ խմբակցության պատգամավոր Արծվիկ Մինասյանը` նշելով, որ երկրում ստեղծված սոցիալ-տնտեսական իրավիճակի մեղավորը հենց կառավարությունն է:

Նա նաեւ տեղեկացրեց, որ իրենք մտադիր են հարցապնդումը քննարկել ԱԺ լիագումար նիստում, ինչից հետո, ամենայն հավանականությամբ,  կբարձրացնեն նաեւ կառավարությանն անվստահություն հայտնելու հարցը:

«Մեր կառավարությունն այդքան վճռականություն չունի` սեփական սխալները խոստովանելու և ինքնակամ հեռանալու, հավանաբար մենք կդիմենք Սահմանադրությամբ նախատեսված գործողությունների»,- ասաց Արծվիկ Մինասյանը։