Ոտնձգություն Շվեդիայի թագուհու դեմ

Նյույորքյան խանութներից մեկում Շվեդիայի թագուհու եւ «Աֆթոնբլադետ» թերթի լրագրողի հանդիպումը տխուր վախճան է ունեցել. թագուհին ոլորել է ոտքը եւ վնասել դաստակը:

Թագուհին դստեր` արքայադուստր Մադլենի հետ ԱՄՆ-ում է` կապված իր ղեկավարած Միջազգային մանկական հիմնադրամի գործերի հետ:

Արտասահման այցելությունների ժամանակ թագուհի Սիլվիան հաճախ է իր պահարանը թարմացնում մոդայիկ բուտիկներում:

Այսօր թագավորական տան տարածած հաղորդագրության համաձայն` նյույորքյան խանութներից մեկն այցելության ժամանակ նրա հետեւից խանութ է մտել լուսանկարիչ-պապարացին: Անտեսելով բարձրաստիճան տիկնոջ հորդորները` պապարացին շարունակել է լուսանկարել, եւ թագուհին ստիպված է եղել լքել խանութը հետին դռնից:

Երբ նա հապշտապ մոտեցել է իր մեքենային, լուսանկարիչը վազել է նրա հետեւից: Թագուհին ընկել է եւ վնասել ձեռքն ու ոտքը:

«Համարում եմ, որ այդ պահվածքը, ըստ շվեդական օրենսդրության, կարելի է որակել որպես ոտնձգություն»,- հայտարարել է թագավորական տան մամուլի խոսնակը: