Հարձակվել են Գոգենի կտավի վրա

Անցյալ շաբաթ Վաշինգտոնի Արվեստների ազգային պատկերասրահում  մի կին հարձակվել է Գոգենի «Երկու թաիթուհի» (1899) կտավի վրա. «Վաշինգտոն փոստին» պատմել է ականտեսներից մեկը:

«Սա չարիք է»,- ճչացել է կինը ու փորձել է նկարը պոկել պատից: Նա բռունցքներով հարվածել է նկարը պաշտպանող ապակենման պլաստիկին: Բորբոքված կնոջը նկարից հեռացրել է պատկերասրահի մեկ այլ այցելու:

Կնոջը ձերբակալել են եւ ներկայացրել պատկերասրահի սեփականությունը վնասելու եւ կտավ գողանալու փորձ կատարելու մեղադրանք: Նրա ինքնությունը իրավապահպան մարմինները չեն բացահայտում:

Պատկերասրահի խոսնակ Դեբորա Զիսկան ասել է, որ 1899 թվականին ստեղծված կտավը չի վնասվել, սակայն մանրամասն հետազոտությունների արդյունքները հայտնի կդառնան ավելի ուշ:

«Երկու թաիթուհի» կտավը Նյու Յորքի «Մետրոպոլիտեն» թանգարանի սեփականությունն է, որը Վաշինգտոն էր բերվել «Գոգեն. առասպելներ ստեղծողը» խորագրով ցուցադրության համար: Այդ ցուցադրությունը սկսվել է փետրվարին եւ շարունակվելու է մինչեւ հունիսի 5-ը: